Nag-motor nalagpot, napasok sa multicab

CEBU, Philippines – Napasok ilawom sa multicab ang drayber sa motorsiklo human natumba sa karsada diha’ng nasaghiran sa laing motorsiklo nga gikalumbaanay og dagan sa South Poblacion, San Fernando pasado alas 6 sa nakalabay nga buntag.

Giila ang biktima nga si Dindo Aperece, 28, taga Dauis, Bohol, samtang ang drayber sa multicab mao si Gil Rosalejos, 51, taga Inayagan, dakbayan sa Carcar.

Matud ni Police Officer 1 Rodjie Alicaway, desk officer sa San Fernando Police Station nga nahinabi sa Banat News nga si Aperece paingon sa dakbayan sa Mandaue ug may kagukod nga laing tulo ka motorsiklo.

Pag-abot sa mao’ng dapit, usa sa mga kagukod nga motorsiklo ni Aperece ang nisaghid kaniya hinungdan nga sila nalukot sa karsada diin ang biktima didto nalagpot sa pikas habig nga gisubay sa multicab ni Rosalejos ug napasok.

Si Alicaway niingon nga gilikayan pa unta sa drayber sa multicab apan naabtan gyud sa biktima.

Dali pa unta nga gidala sa South General Hospital sa dakbayan sa Naga si Aperece apan gideklarar kini nga dead on arrival.

Ang nakasaghid nga motorsiklo nipasutoy sa pagpadagan nga gibiyaan ang biktima. Nagtuo si Alicaway nga nakaangkon sab og pangos ang naasoy nga drayber apan gumikan sa kahadlok hinungdan nga kini nisibat.

Nakagawas ra sa prisohan ang drayber sa multicab human sa panagsabot nga gihimo tali sa pamilya sa namatay. – /GMR) (BANAT NEWS)