Cebu City slaughterhouse pasirad-an
CEBU, Philippines – Gihulagway ni Mandaue City Treasurer Atty. Regal Oliva nga walay ayo nga kasabot ang pipila ka mga kawani sa Cebu City Hall human dul-an na usa ka tuig nga gipaningil sa utang sa ihawan niini nga nahimutang sa Mandaue City wa gihapon mobayad.
Niadtong Agosto, gipadad-an na ang Cebu City sa final demand letter apan hangtud kagahapong adlawa walay nadawat nga tubag ang Mandaue.
Ang Mandaue naningil sa real property tax sa Cebu City Slaughterhouse nga nahimutang sa Mahiga Creek sa habig sa ilang siyudad, wala usab kini business permit sa Mandaue.
Niadtong Oktubre sa miaging tuig naukay ang isyu dihang gipangguba ang tanang estraktura nga nasulod sa 3-meter easement zones sa kasapaan tungod kay gikonsiderar kining danger zones sa Cebu City. Niadtong Agosto 14, nipadala si Oliva sa final demand letter ug gihatagan lang angsiyudad og lima ka adlaw sa pagtuman niini apan hangtud ning pagbalita walay tubag gikan sa Cebu City.
Karong semanaha, moduso si Oliva og rekomendasyon ngadto kang Mayor Jonas Cortes ug sa City Attorney's Office alang sa hingpit nga pagpasira sa slaughterhouse sa Cebu City.
Samtang si Cebu City Treasurer Diwa Cuevas nagkanayon nga makigtagbo pa siya sa Local Finance Committee sa dakbayan aron tukion ang lakang nilang buhaton. Dugang pa ni Cuevas nga wala pa sila kahibalo kun pila ang bayranan. – /EIM) (BANAT NEWS)
- Latest
