Sindikato napuhag

CEBU, Philippines – Sindikato sa mga Taiwanese ug Chinese nationals nga mangilkil sa ilang mga katagi-nasud gipuhag sa Regional Intelligence Division sa Police Regional Office (PRO)-7 ug sa Bureau of Immigration ug Taiwan Economic Cultural Office (TECO).

Siyam ka search warrants ang gi-serve batok sa mga Chinese ug Taiwanese nga gihulagway nga sakop sa usa ka sindikato nga nagbase dinhi sa siyudad sa Sugbo.

Pipila sa girumbo sa kapulisan sa ilang operasyon mao ang Sitio Tigbao ug Sunflower Drive, Sunny Hills Brgy. Talamban ug sa Casals Village sa Brgy. Mabolo dakbayan sa Sugbo.

Nasayran, sa gihimong operasyon sa mga tinugyanan sa balaod, dul-an sa 70 ka mga Chinese ug Taiwanese ang nadakpan ug dunay pipila kanila ang gidala sa tambalanan human nangaangol dihang suway nga mieskapo pinaagi sa pag-ambak sa ilang gipuy-an.

Base sa impormasyon nga nakuha sa kapulisan ang maong sindikato nalambigit sa pagpangilad pinaagi sa internet, diin ang ilang biktimahon mga kauban ra usab nila didto sa China ug Taiwan.

Giingong ang mga dinakpan magpatuo nga mga tinugyanan sa balaod ug target nilang pangwartahan ang negosyante nilang kababayan.

Matud pa ilaha kining hadlukon pinaagi sa pag-ingon nakalapas sila sa Anti-Money Laundering Act (AMLA) ug aron dili sila mabutang sa watch lists ug aron dili sila dakpon mandoan nila ang mga biktima nga i-deposito sa ilang mga bank accounts ang sobra nga kwarta base sa nalatid sa AMLA.

Kun makuha na sa sindikato ang kwarta putlon na nila ang ilang mga komunikasyon.

Matud ni Superintendent Rex Derilo, ang mga dinakpan nakalapas sa Republic Act 8484 kon Access Devices Regulation Act. Sumala pa ni Derilo, organisadong sindikato ang grupo nga nag-operate sa bisan asang dapit dinhi sa siyudad.

Hinuon wala na mohatag pa og dugang impormasyon si Derilo labot sa grupo kay si Chief Superintendent Prudencio Tom Bañas na maoy  modetalye niini.

Samtang sila si Atty. Casimiro Madarang II ug Atty. Ronald Deray sa Bureau of Immigration kinsa didto sa gihimong operasyon miingon ang maong mga langyaw dili pa lang dugay dinhi sa Pilipinas.

Base sa ilang random inspection sa mga pasaporte sa mga dinakpan duha kanila miabot dinhi sa nasud niadto pang Agosto 15.

Matud ni Deray, Legal Officer sa BI posible pag-abot sa Ninoy Aquino International Airport (NAIA) midiretso sila dinhi sa Sugbo ug nangabang og balay sa mga subdivision.

Si Madarang sa iyang bahin miingon nga ilaha karong gitun-an kung dunay nalapas nga Immigration Laws ang mga dinakpan aron himuong basehan pagpa-deport kanila. Ang mga pasaporte sa mga dinakpan nag-ingon nga sila mga turista lang ug nagpasabot nga wala silay pagtugot nga manarbaho ug magnegosyo dinhi.

Giangkon sa BI nga karon lang sila nasayod sa modus operandi sa grupo dihang ang TECO misang-at og reklamo.

Ang mga dinakpan nagdumili sa paghatag og pamahayag kabahin sa pagsikop kanila. – /EIM) (BANAT NEWS)