Mga kapitan, konsehal sa San Remigio nihural sa LP
CEBU, Philippines – Nihural sa Liberal Party ang mga kapitan ug konsehal sa lungsod sa San Remigio kagahapon sa buntag kang Gobernador Hilario Davide III kinsa mao’y provincial chairman sa partido.
Si Mayor Mariano Martinez nibutyag nga sa 27 ka barangay, 19 ka kapitan ang nakig-alyado sa LP gikan sa 10 lang ka kapitan kaniadto.
Subay niini lima na usab ka konsehal sa lungsod ang kaalyado karon sa LP nga sila si Condrado Loon, Yampoy Po, Romy Reynes, Tony Villamor ug Bebot Frasco.
Si Loon ug Po kanhi kaalyado sa One Cebu Party.
Si Davide sa iyang bahin nagkanayun nga nalipay siya tungod kay napun-an ang mga sakop sa LP.
Si Davide mapasalamaton nga sa ikaupat nga distrito sa probinsiya wala’y problema nga nitumaw dili sama sa una’ng distrito nga ang LP nagkabangi.
Gibutyag ni Davide nga wala pa sila’y napilian nga ituboy sa sunod tuig nga eleksiyon sa pagka-kongresista sa ikaupat nga distrito ingon man sa hunta probinsiyal.
Dugang ni Davide nga mangonsulta pa sila sa district chairman nga si Bogo City Mayor Celestino Martinez, Jr. ug sa mga lider nila sa distrito. – /GMR) (BANAT NEWS)
- Latest
