Nibayad og peke naapsan sa kapolisan

CEBU, Philippines – Nasikop sa kapolisan sa dakbayan sa Talisay didto sa lungsod sa Argao ang usa ka lalaki nga gireklamo nga nagdala og mga mini nga kwarta pasado alas 11 sa niagi’ng buntag. Ang nasikop naila nga si Loreto Sebastian, 44, taga Tupaz Street, Fairview Village, Tabunok, dakbayan sa Talisay nunot sa reklamo ni Agapito Santarita nga usa ka tindero og isda.

Si Santarita nakadawat sa mini nga P500 nga gigamit ni Sebastian sa pagpalit og usa ka kilo nga isda.

Matud pa nga human nibayad ang suspek ug nasuklian sa tindero og P350, nagdali kini nga nisibat ug diha na nahibaw-an ni Santarita nga peke ang kwarta human nga iya kini’ng gitandi sa tinuod nga P500.

Giaksiyonan dayun sa kapolisan ang reklamo ug naabtan pa nila ang suspek nga nag-atang og bus sa waiting shed sa Poblacion, Argao. Gisita sa kapolisan ang suspek ug didto nakuhaan pa gyud siya og upat ka P1,000 ug usa ka P500 nga gituohang mini sab hinungdan sa iya’ng pagkatanggong ug mag-atubang og kaso’ng pagpalusot og mini nga kwarta. – /GMR) (BANAT NEWS)