Napasok sa trak, patay

CEBU, Philippines – Patay ang usa ka motorista ug grabe usab nga naangol ang usa ka inahan ug 6-anyos nga anak niini dihang nadagit ilang motor sa gikasugat nga wing van sa dalan national sa Sitio Santo Niño, Brgy. Poblacion, lungsod sa Sogod sa miaging gabii.

Si Police Officer 2 Raymond Bacordo sa Sogod Police Station miila sa namatay nga mao si Ruel Empacis, 25, taga dakbayan sa Talisay ug ang grabeng mga naangol mao sila si Sharon Abejon, 24, ug anak niini nga si Shinny Abejon.

Matud pa ni Bacordo nga gikan sa dakbayan sa Sugbo ang motorsiklo nga gidala ni Empacis ug nagpadulong kini sa amihanang bahin sa Sugbo.

Sa paghidangat niini sa maong dapit, nasaghid sila sa wing van nga sakyanan nga gipanag-iya  sa usa ka forwarding company nga nagbase sa dakbayan sa Sugbo nga gimaneho ni Reneboy Alabam, 30, taga San Juan,  National Capital Region.

Dugang pa ni Bacordo nga tungod sa kakusog sa impact nalagpot ang mga biktima.

Si Bacordo miingon nga si Empacis nga wala magsuot og helmet ug ang mga biktima nga nalagpot ug napantok ang ulo ngadto sa karsada hinungdan sa dakong kadaot niini.

Ang mga biktma daling gidala ngadto sa Bogo Provincial Hospital  apan si Empacis gideklarar sa mga doktor nga dead on arrival.

Ang inahan ug anak nga mga biktima nga grabe ang kahimtang gibalhin ngadto sa Vicente Sotto Memorial Medical Center sa Dakbayan sa Sugbo.

Samtang ang drayber mitahan usab ngadto sa ilang buhatan human sa maong hitabo ug temporaryo karon nilang gitanggong sa detention cell. – /EIM) (BANAT NEWS)