Mga marijuana naibot sa kapolisan

CEBU, Philippines – Mga 10,000 ka punoan sa marijuana nga gitanom sa hilit nga dapit sa Sitio Busay, Barangay Patong, Badian gipangibot sa mga sakop sa PNP Regional Public Safety Battalion-7 kaniadtong Biyernes sa buntag.

Ang grupo sa kapolisan nga gipadala ni Supt. Jonathan Pineda miresponde sa mao nga lugar tungod sa report nga adunay armado nga mga tawo nga nasigpatan.

Sa ilang pagtungas sa bukid aron pagpangita sa mga armado, nakit-an nila ang mga tinanom nga marijuana, aduna pay mga bag-ong similya.

Si PO1 Edwin Catamco nga nagsilbe nga tigpamaba sa RPSB-7 miingon nga pagkasigpat ni Pineda sa plantasyon sa marijuana gimandoan dayon niya ang mga sakop nga kini pangibton ug ang uban gidala sa headquarters.

Gawas sa mga 10,000 ka tag-as na nga punoan sa marijuana may mga 5,000 pa ka seedlings.

Si Supt. Pineda miingon nga matag karon ug unya makadawat sila og taho sa presensiya sa mga tawo didto sa kabukiran sa Badian.

Matud ni Catamco nga ang uban sa mga marijuana nga naibot gidauban ra didto tungod kay bug-at kaayo kun pas-anon nila ang tanan sa ilang headquarters sa Barangay Bahay, Sibonga.

Niadtong miaging Biyernes ‘sab ang kapolisan nakaibot gihapon og marijuana sa lungsod sa Dalaguete. Mikabat na sa 15,000 ka punoan sa marijuana ang naibot sa kapolisan sulod lang sa duha ka semana. – /RUB) (BANAT NEWS)