Taga Pepang nabalaka, demolisyon tiwason

CEBU, Philippines - Nabalaka ang mga molupyo sa luna sa Doña Pepang Cemetery nga panggub-on na usab sa City Hall clearing team ang ilan’g kabalayan.

Ang mga sakop sa PROBE Team motiwas na unta pagpangguba sa siyam ka balay nga nasugdan na nila’g guba sa niagi’ng mga adlaw apan wala sila nakapadayun diha’ng nibunok ang uwan.

Si kanhi kongresista Tomas R. Osmeña niadto sa mao’ng dapit kagahapon ug nisaway kang acting Mayor Edgardo Labella kay wa kini makapahunong sa demolisyon.

Matud ni Osmeña nga si Labella nakaawhag sa DPWH nga ipahunong ang pagguba sa duha ka karaang balay sa Mabolo apan nipapadayun sa pagpaguba sa kabalayan sa Doña Pepang Cemetery.

Apan nangatarungan si Labella nga wala’y bag-ong demolisyon nga gihimo kagahapon kay ang mga sakop sa PROBE igo lang nipadayon sa nasugdan.

Gipasalig ni Labella nga gawas sa siyam ka balay nga nasugdan na’g guba, ang uban dili nila panggub-on hangtud nga maseguro na ang dapit nga kabalhinan. Ang tag-iya sa siyam ka balay nga gisugdan na pagguba sa PROBE wala pa kahatagi og relocation site sa Lorega-San Miguel.

Si Osmeña nipasalig nga dili niya talikdan ang mga molupyo sa Doña Pepang aron kaprotehian ang ila’ng katungod. (Rene U. Borromeo ug Sheriza Mae R. Uy/GMR)(BANAT NEWS)