APEC delegate wa pasakya’s eroplano kay gipiskat

CEBU, Philippines - Usa ka lokal nga delegado sa Asia-Pacific Economic Cooperation (APEC) Summit wala pasakya sa eroplano paingon unta sa Manila niadtong Miyerkules kay nagpuwa ang iyang mata ug nanghubag nga mura’g gipiskat.

Si Dr. Mario Joyag, assistant head sa Provincial Health Office (PHO), nagkanayon nga adunay mga medical team nga gidestino sa mga lugar nga gihimoan sa miting sa APEC aron ila dayon mga maatiman kun may mga delegado nga gipiskat.

Matud ni Joyag nga usa ka babaye nga delegado ang mibalik sa hotel human nga gibalibaran sa iyang pagsakay unta sa eroplano paingon sa Manila.

Si Joyag miingon nga dali nila nga gibisita ang maong delegado ug gihatagan dayon og tambal ug posible nga karong adlawa, Biyernes, matugotan na nga makapauli sa Manila.

Mipahinumdom si Joyag nga ang pagmentenar sa kalimpiyo maoy angayan nga buhaton aron dili mataptan og piskat.

Ang kagaw sa piskat motakod kini sa laing tawo kun ang maong tawo nakagunit sa kamot sa gipiskat unya ang iyang kamot gilugod o gihikap sa iyang mata.

Pipila ka adlaw ang nakalabay, ang mga polis nga nadestino sa APEC meeting maoy una nga nataptan og piskat.

Apan matud ni Joyag nga gawas sa piskat ang ubang polis nga nadestino sa APEC nakasinati usab og “respiratory infection” sama sa ubo ug sip-on tungod sa klima nga sobra kainit unya mokalit usab og uwan.   (BANAT NEWS)