Nagtanom og marijuana gidakop
CEBU, Philippines - Gidakop sa mga polis ang usa ka tawo nga nagtanom ug nag-alima og tulo ka dagko na nga punoan sa marijuana sa tugkaran sa iyang panimalay didto sa Sitio Bayabas, Barangay Magay, Compostela.
Si Inspector Romeo Caacoy, hepe sa Compostela Police Station, miingon nga si Forton Garcia, 28, gidakop nila kaniadtong Miyerkules sa hapon.
Ang kapolisan nakadawat og inpormasyon nga si Garcia nag-alima og tulo ka dagko’ng punoan sa marijuana nga giipon niya pagtanom uban sa mga utanon sa iyang garden.
Nasuta sa team nga gipangulohan ni SPO4 Wilfredo Catorsa nga tinuod ang taho mao nga gidakop nila si Garcia ug gipangibot ang mga marijuana.
Si Garcia nga gipriso na giandaman na og kaso nga paglapas sa lagda sa Republic Act 9165 kon Comprehensive Dangerous Drug Act.
Ang mga inibot nga marijuana gitugyan na usab sa PNP Crime Laboratory aron mahimoan og dugang pakisusi nga magamit isip ebidensiya. (BANAT NEWS)
- Latest
