Habal-habal drivers miabuso

CEBU, Philippines - Tungod kay wala na pabiyahea ang mga passenger jeepney subay sa Pope John Paul II Avenue gikan sa Mabolo paingon sa JY Square sa Lahug, misiaw ang mga drayber sa “habal-habal” nga naningil og mahal nga plete gikan sa ilang mga pasahero.

Mga sumasakay nangreklamo tungod kay imbes mogasto ra sila og P7 nga plete sa PUJ sa ilang pagsakay gikan sa rotunda sa Lahug paingon sa SM City, karon pangayoan sila og P30 ngadto sa P50 nga plete sa mga drayber og habal-habal.

Si Rey Gealon, executive officer sa Cebu City Transportation Office (CCTO), miingon nga adunay mireklamo kanila nga pagsakay niya’g habal-habal ang drayber midemanda og P50.

Ang SM City paingon sa rotunda sa Lahug may gilay-on lang nga upat ngadto sa lima ka kilometro. Wala na paagia sa mao nga karsada ang mga PUJ kay aron dili kaayo masamok ang trapiko ug dili mahasol ang mga delegado sa APEC summit.

Ang ubang kalihukan sa APEC summit anaa gipahigayon sa Waterfront Hotel Cebu and Casino diha sa Salinas Drive. Ang rota sa PUJ nga 04L maoy grabe nga naapektahan kay wala na sila tugoti nga makasubay sa Pope John Paul II Avenue.

Matud sa ubang drayber og habal-habal nga sila “nadamay” lang sa gihimo niadtong mapahimuslanon nga midemanda og P50 gikan sa iyang pasahero nga nakaaghat sa hingtungdan sa pagreklamo sa CCTO.

Ang pag-operate og habal-habal kon motorsiklo nga gamiton sa pagpamasahero wala gayud itugot sa balaod apan ang kagamhanan wala usab moestrikto sa paghimo’g kampanya aron pagpuo sa mga habal-habal.

Nahibaw-an nga daghan ang mga nagpakabuhi pinaagi sa pagpamasahero gamit ang motorsiklo. Nabalaka ang daghang habal-habal drayber nga tingali og estriktohon sila tungod sa gihimong pagpahimulos sa ubang drayber. (BANAT NEWS)