SSS alkansiya program ilusad sa City Jail

CEBU, Philippines – Interesado ang katunga sa mga piniriso sa Cebu City Jail Female Dormitory sa alkansiya program sa Social Security System nga ilusad sunod semana. Matud ni Jail Warden, Senior Inspector Stephany Sotero, ang mao’ng proyekto gikan sa rehiyonal nga buhatan diin ang mga inmates nga nagpakita og interest hatagan nila og alkansiya aron hulog-hulogan sa ila’ng kwarta hangtod nga makaabot kini sa gikatakda nga kantidad nga pangayoon sa SSS aron sila makaapil sa mga benepisyo.

Sumala pa ni Sotero nga ang matag inmate motigum sa ila’ng kita sa mga livelihood programs o kaha sa mga hinatag sa ila’ng mga duaw aron sa higayun nga mogawas na sila sa bilanggoan mahimo ra gihapon nila’ng ipadayun ang pagsulod og kwarta sa SSS.

Ang mao’ng proyekto suway lang kung makasugakod ba ang mga inmates sa pagtigum sa ila’ng ginagmay nga kita aron ipasulod sa ila’ng SSS nga mahimo nila’ng magamit sa umaabot nga adlaw. Malaumon si Sotero nga daghan ang moapil sa mao’ng proyekto ug gipaneguro niya nga dili kini pinugsanay ug kutob lang sa ganahan nga moapil.

Gipahibawo usab ni Sotero nga gawas sa SSS alkansiya program, duna usab sila’y PhilHealth program nga mahimo’ng maapilan sa mga inmates.

Samtang gibutyag ni Sotero nga karong buwana na nila ilusad ang Female Dancing Inmates human nakompleto na ang mga dancers sa ila’ng mga costumes. Mapasalamaton ug andam gihapon sila modawat og mga sponsors alang sa kalihukan sa dancing inmates. – /GMR) (BANAT NEWS)