Seguridad sa APEC mas pahugtan

CEBU, Philippines – Mas hugot nga seguridad ang ipatuman sa kapolisan nunot sa pag-abot na sa mga tag-as nga opisyal sa 21 ka member economies sa Asia-Pacific Economic Cooperation (APEC) Summit sa Sugbo.

Sumala pa sa tigpamaba sa Site Task Group Cebu, Senior Supt. Rey Lyndon Lawas, nga kinahanglan nga ang kapolisan mo-level-up sa ila’ng paghatag og seguridad sa mga delegado.

Iya’ng gitataw nga wala sila’y nadawat nga bisan unsa’ng hulga nga posible’ng motumaw atol sa APEC Summit.

Sukad napakatap sa kadalanan ug nagkalain-lain mga lugar nga himoan sa mga meetings ug sa mga hotels nga giabtan sa mga delegado, gikataho nga nikunhod ang krimen sa Metro Cebu.

Iya sab gipasalamatan ang publiko sa pagsuporta sa kalihukan sa APEC sanglit sila man ang direkta’ng naapektuhan ilabi na sa rerouting.

Samtang iya’ng gipahibawo sa mga sakop sa media nga sukad sa pagsugod sa APEC Summit hangtud kagahapon, wala sila’y nadawat nga taho sa mga insidenti may labot sa APEC Meetings.

Sa laing bahin, giawhag sa Department of Interior and Local Government ang mga motorista ug commuters sa Sugbo nga planuhon ang mga lakaw tungod sa mga kalihukan sa APEC Summit.

Si DILG-7 Director Rene Burdeos nanawagan usab sa mga opisyal sa barangay ug traffic enforcers nga motabang sa pagpahapsay sa trapiko sa kadalanan.

Si Burdeos nagpasalamat sa tanang sektor nga nisuporta sa pagmintinar sa kahapsay sa dagan sa trapiko atol sa pagsugod sa APEC Summit niadto’ng Agosto 22.

Kagahapon hangtud karong Septiyembre 2, ipahigayun ang ika-46 nga tigum sa APEC Expert Group on Energy Efficiency and Conservation (EGEE&C) isip kabahin sa 12th APEC Energy Ministers’ Meeting sa Marco Polo Plaza. (BANAT NEWS)