Natumbahan sa multicab

CEBU, Philippines – Usa ka 13-anyos nga lalaki nga gikang misimba namatay diha nga natumbahan siya sa multicab nga nawad-an og preno didto sa bakilid nga bahin sa Barangay Sua, Argao kaniadtong Domingo sa hapon.

Si PO3 Nilo Branzuela sa Argao Police Station mitug-an nga ang biktima nga si John Paul Biano abtik unta kaayo nga nakaambak sa gisakyan niya nga multicab ug misuway kini’g bangil sa ligid aron dili na modailos.

Apan ang drayber sa multicab nga si Felix Etagonde, 34-anyos nga mechanical engineer, wala na g’yud makapugong pa sa sakyanan hinungdan sa iyang pagkalintuwad ug nadat-ogan ang biktima.

Matud ni PO3 Branzuela nga ang batan-on dali gihapon nga gidala sa Argao District Hospital apan wala na g’yud matabang tungod sa kadaot nga iyang nahiagoman sa iyang lawas.

Si Biano ug ang iyang inahan ug ubang sakop sa pamilya gikan nga misimba ug nagpaingon na unta nga mopauli sa ilang panimalay apan kalit lang nawagtangan sa preno ang sakyanan.

Ang batan-on nahasiril-siril sa pagpangita’g bato nga iyang ikabangil sa ligid apan natumbahan siya sa multicab.

Matud ni PO3 Branzuela nga nagtuo sila nga ang kabanayan sa namatay dili lang mopasaka og kaso sa drayber kay uyoan ra kini sa biktima ingon man wala gituyo ang hitabo. – /RUB) (BANAT NEWS)