Isyu sa ihawan sa dakbayan sa Sugbo sulbaron

CEBU, Philippines – Ang Cebu City Legal Office miawhag ni City Treasurer Diwa Cuevas nga paspasan ang paghikay sa mga dokumento nga gikinahanglan sa dakbayan sa Mandaue aron dili na makabayad og buhis ang siyudad kabahin sa ihawan niini diha sa North Reclamation Area (NRA).

Ang ihawan sa dakbayan sa Sugbo diha sa North Reclamation Area wala tuyoa nga natukod sa dapit nga sakop na sa Mandaue mao nga ang kagamhanan sa Mandaue midemanda og real property tax gikan sa dakbayan sa Sugbo.

Si Mandaue City Treasurer Regal Oliva mihulga gani nga isugyot niya nga patak-opan ang ihawan sa dakbayan sa Sugbo nga anaa sakop sa ilang teritoryo tungod sa milyon-milyon ka pesos na nga wala kabayri nga buhis.

Matud ni Cuevas nga dili mobayad ang dakbayan sa Sugbo sa gidemanda nga buhis tungod kay ang mao nga ihawan gipanag-iya man sa kagamhanan ug kini wala man gamita sa siyudad alang sa negosyo.

Si Oliva nagkanayon nga kun gusto sa mga opisyal sa dakbayan sa Sugbo nga dili kini makabayad og buhis kinahanglang mosumiter sila og mga dokumento nga mosuporta sa ilang pangangkon.