Tawo nga may sakit naghikog

CEBU, Philippines – Tawo nga adunay sakit ug naglisod pagpangita’g ikagasto sa iyang pagpatambal, naghikog na lang sulod sa iyang panimalay didto sa Barangay Taytayan, Bogo kaniadtong Biyernes.

Patay na nga napalgan si Jameson Paduga Pabillon, 30-anyos, nga lumolupyo gihapon sa mao nga dapit. Wala ikabutyag kun unsa g’yud ang balatian nga gihambin ni Pabillon.

Si PO3 Elymar Mendoza sa Bogo City Police Station miingon nga wala makabantay ang mga tagtungod ni Pabillon nga nagtinguha siya sa paghikog.

Ang usa ka sakop sa pamilya nahibulong na lang kay wala na sila makaalinggat ni Pabillon sa taas nga bahin sa ilang dos andanas nga balay ug sa ilang pagsusi nagbitay na  kini sa pisi.

Gitataw ni PO3 Mendoza nga ang suliran sa salapi mao g’yud ang gituohan nga nakaaghat ni Pabillon nga maghikog kay wala siya’y magasto sa pagpatambal. (Romeo T. Limpangog/RUB)

Ahente gitulis na usab

Laing mga ahente na usab sa usa ka kompaniya og ilimnon ang nabiktima sa tulisan samtang nag-deliver kini sa ilang produkto sa Barangay Don Juan Climaco, dakbayan sa Toledo.

Sila si Brian Olmoguez, 29, ug Noel Apura, 40, pulos taga siyudad sa Sugbo, misumbong sa kapolisan sa Toledo human sila gitulis sa duha ka lalaki nga nagmaskara. Samtang naghatod ang mga biktima sa ilang produkto sa usa ka botika sa nahisgutang lugar, kalit nga mibutho ang duha ka lalaki nga nag-bonnet ug sakay sa XRM nga motor, dayon nideklarar og tulis.

Nakuha sa mga tulisan ang kinolekta nga kuwarta sa mga ahente nga kapin P2 mil.

Sagunson na ang nahitabo nga pagpanulis sa siyudad diin sagad sa mga biktima mga ahente og produkto nga gituohang gitiman-an ug gipanid-an lang sa mga tulisan.

Gituohan nga mao ra ang mga tulisan nga mibiktima sa mga ahente kay matag report sa mga biktima mao ra usab ang ilang gipangsul-ob ug ang gisakyan nga motor nga ilang gisakyan. – /RUB) (BANAT NEWS)