Tinun-an nadam-agan og motor

CEBU, Philippines – Usa ka 11-anyos nga tinun-an sa elementarya didto sa lungsod sa Alegria nalandig sa ospital human kini madam-agi og motorsiklo nga gimaneho sa tawo nga wala’y lisensya.

Ang biktima nga si Henrix Samson, tinun-an sa Grade 6 nadasmagan sa motorsiklo nga gimaneho ni Mark Anthony Redina, 19, nga nagtungha usab sa Montpeller National High School sa mao nga lungsod.

Sa imbestigasyon sa kapolisan nasayran nga samtang nag- parade ang mga tinun-an isip kabahin sa pagbukas sa ilang district sports and cultural meet, nadasmagan ni Redina ang biktima nga mitabok sa karsada.

Ang biktima nakaangkon og mga pangos ug bun-og sa kalawasan ug dali kini nga gidala sa usa ka pribado nga tambalanan sa maong lungsod.

Matud ni PO2 Leonard Francis Cabahug, desk officer sa Alegria Police Station, nga wala’y lisensya ang drayber sa motorsiklo. Nabuhian ra hinuon si Redina kay milapas man ang reglementary period apan mahimo pa gihapon siya nga pasakaan og kaso.

Matud ni PO2 Cabahug nga ilang paaboton karong adlawa ang pamilya sa biktima kun mopasaka ba sila og kaso. – /RUB) (BANAT NEWS)