Piskat misiaw bisan og ting-uwan ‘ron

CEBU, Philippines - Miuso na usab karon ang Conjunctivitis o piskat bisan og karong panahona dili pa kaayo ting-init. Ang piskat mao ang pagpamuwa sa mata, inubanan sa pagluha-luha ug pagmuta nga sambol kaayo itan-aw.

Sagad sa piskat nga masinati karon sa katawhan mao ang gitawag og viral o kining magmuta ang mata nga molungtad og usa ka semana. Gibutyag ni Rennan Cimafranca, pangulo sa Regional Epidemiology Surveillance Unit (RESU)-7, nga wala pa sila makakuha og statistics kun pila na ang nakasinati og piskat dinhi sa rehiyon.

Nagtuo si Cimafranca nga ang mild El Niño usa sa nakatampo kun ngano nga miuso na ‘sab ang piskat ug gipaabot nga mas modaghan pa kini tungod sa init ug unya kalit lang mobunok ang uwan.

Adunay duha ka klase sa piskat nga mao ang viral o kadtong motumaw panahon sa ting-init ug ikaduha mao ang allergy nga makuha tungod sa abog o polusyon sa komunidad.

Gipasabot ni Cimafranca nga mas dali makatakod ang viral kay bisan mahikapan lang nimo ang muta ug mahikap kini sa pikas mata nga wala’y piskat posible nga motakod na ang piskat.

Tambag ni Cimafranca ngadto sa adunay piskat nga dili g’yud direkta nga hikapon sa kamot ang ilang mata ug dili usab kini lugoron. Angay nga kanunayon ang paghugas sa kamot kun makahikap kini sa mata.

Ang publiko giawhag nga modangop dayon sa doktor kun makasinati sila og indikasyon nga natakboyan na sila og piskat. (BANAT NEWS)