Krimen sa Sugbo mikunhod

CEBU, Philippines - Mikunhod ang krimen sa Metro Cebu tungod sa mga polis nga gipakatap sa kadalanan niining pagpahigayon sa Asia-Pacific Economic Cooperation Meet (APEC) sumala pa sa opisyal sa Police Regional Office (PRO)-7.

Ang pangulo sa APEC secretariat committee, Senior Superintendent Rey Lyndon Lawas mibutyag nga gikan sa unang semana sa milabay’ng buwan sa Hulyo hangtud niining semanaha mikunhod ngadto sa tulo ka porsiyento ang kinatibuk-ang krimen nganhi sa Sugbo.

Matud niya nga sa index crime mikunhod kini ngadto sa 14 porsiyento apan misaka ang non-index crime tungod kay kanunay ang operasyon sa kapolisan.

Ang index crimes mao ang murder, homicide, physical injury, rape, (crimes against person), robbery ug kawat (crimes against property).

Samtang ang non-index crime mao ang kalapasan sa mga special laws sama sa drugas, environmental laws, illegal possession of firearms, explosives, smuggling, carnapping, vagrancy, prostitution, alarm and scandal, estafa, falsification, corruption of public official, gambling ug damage to property.

Sobra 3,000 ka polis ang gipakatap sa kadalanan karong mga panahona ug gitun-an karon kun unsaon nga magpabilin ang pakunhod sa krimen kun mamalik na sa ilang mga lugar ang augmentation forces.

Sa laing bahin, bisan sa kaukopado sa kapolisan sa security sa APEC ug lakip usab sa mga moanhi nga mga opisyal gikan sa Manila wala nila mapasagdi ang regular nilang function o inadlaw nilang mga gimbuhaton sama sa paggukod sa mga nakalapas sa balaod ug uban pang operasyon. (Brenda D. Batuto/EIM)(BANAT NEWS)