13 ka pamilya nasunogan sa Mabolo

CEBU, Philippines - Upat ka mga balay ang naugdaw ug usa ang partially damaged human usa ka sunog ang miigo sa Sitio Sindulan, Brgy. Mabolo ning dakbayan sa Sugbo kagahapon sa buntag.

Matud pa ni Senior Fire Officer 4 Jovito Abelgas sa Bureau of Fire nga alas 10:35 sa buntag ilang nadawat ang alarma ug paglabay sa 15 minutos ilang nakontrolar ang kalayo.

Sumala pa ni Abelgas nga nagsugod ang sunog sa panimalay ni Elvira Dela Cruz ug  mitapon sa upat ka mga balay sa silingan ug usa niini nakan-an lang sa kalayo.

Sagad sa mga balay ginama sa light materials maong paspas kaayo ang pagdako sa kalayo ug nagbilin og kapin  P90 mil nga danyos.

Usa sa gisubay karon sa kabomberohan ang report nga ilang nakuha nga duna’y nagdaob sa likod sa balay ni Dela Cruz ug ang report nga gituyo pagsunog ang lugar. Matud pa napalit na ang maong luna. 

Samtang ang  dakbayan sa Sugbo  mohatag og tag P10 mil nga financial assistance ug housing materials sa mga nasunogan matud pa ni Konsehal Dave Tumulak kinsa pangulo sa Cebu City Disaster Risk Reduction Management Council (CDDRRMC).

Gibutyag usab sa pangulo sa Department of Social Welfare Services (DSWS) Ester Concha, 13 ka pamilya ang apektado sa maong sunog.  (BANAT NEWS)