P1M marijuana nalarot

CEBU, Philippines - Moabot sa lima ka libo ka dagkong punoan sa marijuana nga mokantidad og P1 milyon ang gipanglarot sa kapulisan sa Balamban ug mga sakop sa Special Forces sa Philippine Army nga nakabasi sa maong lungsod niadtong nakalabay nga adlaw diha sa Sitio Cabatbatan, Brgy. Matun-og.

Gibutyag ni Police Officer 2 Franklin Jaranilla sa Balamban Police nga nahinabi sa Banat News nga dunay mihatag kanila og impormasyon ma’y labot sa plantasyon sa marijuana sa maong dapit.

Sumala pa ni Jaranilla nga alas 3:30 pa sa kaadlawon sila migikan paingon sa maong dapit apan gumikan sa kalayo sa dapit alas- 9 na sila sa buntag naabot sa maong plantasyon nga sudlonon kaayo ug anha agion kilid sa pangpang. Atol sa operasyon walay nasikop ang mga operatiba diin nagduda si Jaranilla nga posibleng nakabantay nang daan ang nananom niini  ug daling  nakasibat.  (BANAT NEWS)