SIAM ikiha sa PAFI

CEBU, Philippines - Si Bokal Grecilda Sanchez, presidente sa PAFI (The Sower of Seeds) Foundation mibahad nga mopasaka og kasong sibil alang sa mga danyos kung dili iuli sa Sarraga Integrated and Management  (SIAM) Group ug Cebu CFI Community Cooperative, Inc. ang exciters sa mga transmitters aron makatingog na sa pagbalik ang Bantay Radyo.

Dul-an usa ka buwan nga wa makasibya ang Bantay Radyo human wa na gi-renew ang kontrata niini tali sa SIAM niadtong Hulyo 31, 2015.

Ang Cebu CFI buot untang mopuli sa pagdumala sa maong radio station apan si Sanchez mipasaka kini og kasong sibil ngadto sa korte tungod kay buot niining i-renew ang ilang kontrata tali sa SIAM.

Niadtong Agosto 24, 2015 si Regional Trial Court (RTC) Judge Alexander Acosta sa Branch 9 mibasura sa partial motion for reconsideration nga giduso sa CFI. Ang korte mimando sa SIAM sa pagpabalik sa exciters sa radio station.

Niadtong Hulyo 30, 2015 ang korte mitugot sa Temporary Restraining Order (TRO) nga giduso ni Sanchez aron magpabilin gihapon kining magdumala sa radio station.

Si Sanchez mibahad nga kung dili ibalik ang exciters sulod sa 24 oras mopasaka siya og kasong sibil alang sa mga danyos nga ilang gisagubang karon.

Matud ni Sanchez nga human nigawas ang TRO gikuha dayon ang tulo ka exciters niadtong Agosto 1, 2015 sa kaadlawon hinungdan nga na-shutdown ang Bantay Radyo.

Gipasabot ni Sanchez nga ang exciter pasilidad nga maoy mo-function sa transmitter aron ang radio station makasibya o makatingog.

Gibutyag ni Sanchez nga duna siya’y naduso nga kasong contempt of court tungod kay ang SIAM ug CFI wala motuman sa order sa korte.

Gibutyag usab ni Sanchez nga ang mga abogado sa CFI ug SIAM mihangyo og arbitration o sabot-sabot apan gusto ni Sanchez nga ipauli una ang mga exciters una sila magsabotsabot.

Dugang niya nga dako na kaayo og danyos nga ilang gisagubang karon tungod kay nagpasweldo sila sa ilang mga tawo bisan og wala silay operasyon ug duna pa silay mga kontrata sa ilang mga advertisers nga nangatanggong.

Sulod sa usa ka buwan kung dili makatingog ang Bantay Radyo mokabat ngadto sa P2 milyones ang ilang alkanse. (BANAT NEWS)