LTO-7 makaprinta na og lisensya

CEBU, Philippines - Makaimprinta na ang Land Transportation Office (LTO-7) sugod niadtong Martes og drivers license human nila madawat niadtong weekend ang printer gikan sa kaulohan. Ang buhatan sa LTO sa siyudad sa Sugbo ug Mandaue gitagsaan na og printer nga mahimong makaprinta og back to back nga ID.

 "Among gipahibawo sa atong kaigsuonan nga sa aplikasyon sa molukat og lisensiya, student permit, renewal of license, correction of names, tanang transaksyon matagaan gyud sila og identification," matud pa ni Arnel Tancinco ang director sa LTO-7.

Sa uwahing talaan sa LTO-7 dunay 22,000 ka mga backlog sa tibuok Central Visayas diin ilaha na usab kining gisugdan sa pag-imprinta.

Sa siyudad sa Sugbo ug Mandaue mayoriya sa gidaghanon sa backlog maoy giuna nila nga mabutangan og printer ang licensing office.

Sigon pa ni Tancinco, Septiyembre 25 maoy target sa national office sa tanang buhatan sa LTO lukop nasud nga mabutangan na og printer.

Samtang ID card na usab ang madawat sa mokuha og student's permit ug ang presyo niini pareho lang sa kantidad niadto.

Mipasalig ang ahensiya nga ma-imprinta gyud nila ang backlog aron makuha na sa tanan nga dunay temporary drivers license ang ilang ID card. (BANAT NEWS)