Tulo ka delegado miadto og Bohol nga wala mananghid

CEBU, Philippines - Tulo ka delegado sa Asia Pacific Economic Cooperation meet gikan sa China ang milighot sa hotel nga ilang gipuy-an ug miadto sa Loboc sa Bohol ug nag- river cruising nga walay pananghid sa mga nagbantay kanila.

Tungod niini, gipasundan sila sa mga polis aron mabantayan ug masiguro ilang seguridad. Nasayran nga sayo sa buntag misakay og taxi ang tulo paingon sa Pier 1 sa dakbayan sa Sugbo ug misakay og ferry paingon sa Bohol.

Giklaro hinuon ni Chief Superintendent Prudencio Bañas, director sa Police Regional Office-7 nga ‘low-level’ nga delegado ang tulo ug mas dali silang makalihoklihok itandi sa mga high level delegates nga may protocol nga gisunod.

Gipasabot ni Bañas nga dili nila pugngan ang mga delegado nga gustong mosuroy sa mga nagkadaiyang lugar apan tulubagon nila ang ilang seguridad.

“Talagang pasaway, para ding mga Filipino sa ibang bansa,” matud pa ni Bañas. Gawas sa maong hitabo wala na sa’y laing problema ang nadawat sa opisyal ma’y labot na sa kalihokan sa APEC.

Gikan sa pagsugod sa APEC niadtong Agosto 24 nagmalampuson ang kapolisan sa seguridad sa mga delegado. Kagahapong adlawa moabot sa 707 ka mga delegado ang naabot dinhi sa Sugbo nga gilangkuban sa 553 ka mga langyaw ug 154 ka mga lokal nga delegado.

“So far maayo gyud ang atong resulta sa pag-secure sa delegado sa APEC Summit sa Cebu with the cooperation ng lahat nang partner agencies and the community at large,” matud pa ni Bañas. Si Bañas nagpasalamat sa publiko nga mipailob sa dagan sa trapiko gumikan sa pag-usab sa rota gumikan sa APEC. (BANAT NEWS)