Pinabuthang isda nasakmit

CEBU, Philippines - Mokabat sa 35 ka kahon sa nagkalain-laing klase sa isda ang nasakmit sa Cebu Provincial Anti-Illegal Fishing Task Force nga gipangulohan karon ni Atty. Chad Estella kagahapon sa hapon.

Atol ning pagsulat sa balita, pito ka kahon sa nahisgutang mga isda nga gisusi nasuta nga nakuha kini pinaagi sa dynamite fishing. Matud pa gikan kini sa Brgy. Mahawak, lungsod sa Medellin. Ang tag-iya sa trak nga gikargahan sa mga isda giila nga si Francisco Ruiz ug gimaneho kini ni Dave Sumbi Maramba kinsa dunay tulo ka truck helpers.

Ang task force nakig-coordinate dayon sa Bureau of Fisheries and Aquatic Resources (BFAR) ug gihikay na ang kasong ipasaka diha sa legal division sa Kapitolyo.

Ang truck nga gikargahan sa mga isda anaa karon sa hawanan sa Kapitolyo samtang ang mga isda nga nasakmit ihatag kini  ngadto sa Cebu Provincial Detention and Rehabilitation Center (CPDRC).

Ang Kapitolyo nangusog sa kampanya batok sa mga isdang nakuha sa illegal fishing pinaagi sa market denial diin pugngan nilang maabot sa kamerkadohan ang mga isda.

Ang dynamite fishing usa sa labing grabe og epekto sa kadaot nga mahatag sa kadagatan tungod kay hasta semilyang isda mangamatay lakip na ang coral reefs. (BANAT NEWS)