Natumbahan sa kahoy

CEBU, Philippines – Patay ang usa ka 2-anyos nga batang lalaki human natumbahan og kahoy nga Ipil-Ipil ang gisakyan nilang motorsiklo kauban ang ginikanan niini diha sa Barangay Esperanza sa lungsod sa Aloguinsan sa nilabay’ng adlaw.

Sumala pa naatrasan sa heavy equipment nga grader ang kahoy samtang gitrabaho ang dulhogon nga bahin sa maong kalsada ug didto natumba sa mga biktima.

Ang namatay mao si Danix Abendan, anak sa magtiayong sila si Roldan ug Genevie Abendan nga taga Sitio Bairan, Brgy. Kawasan, Aloguinsan. Ang bata nakabsan sa kinabuhi sulod sa Cebu Provincial Hospital sa dakbayan sa Carcar human nakaangkon og grabeng bun-og sa lawas.

Ang drayber sa grader giila nga si Jerry Abamo, 41, taga Leyte ug drayber sa Ven Ray Company nga gipanag-iya sa usa ka Henry Coronel nga maoy sub contractor aron trabahuon ang kalsada sa maong dapit.

Matud pa ni Police Officer 3 Nap Segarra ang desk officer sa Aloguinsan Police nga nahinabi sa Banat News paingon sa dakbayan sa Carcar ang pamilya niadtong tungora.

Swerte nga nakalingkawas sa kamatayon ang inahan ug amahan sa bata nga igo lang nakaangkon og mga ginagmay nga bun-og sa lawas.

Nasayran sab sa kapulisan nga walay early warning device nga gibutang ang nagtrabaho sa dalan ug walay kauban ang drayber nga  mopahimangno unta sa mga motorista nga moagi sa maong dapit. – /EIM) (BANAT NEWS)