Rama: Pnoy wa’y proyekto

CEBU, Philippines – Giklaro ni Mayor Michael Rama nga dili iya sa administrasyon ni Presidente Benigno Aquino III ang mga proyekto sa dakbayan sa Sugbo.

Matud ni Rama nga ang giangkon nga widening project sa Serging Osmeña Avenue dugay na ug nadali lang tungod sa kalihukan sa Asia-Pacific Economic Cooperation (APEC) Summit.

Nanghinaut si Rama nga makig-alayon kaniya ang Department of Public Works and Highways aron sila masayud sa gikinahanglan nga proyekto.

Nagtuo hinuon si Rama nga ang gipasiatab ni Aquino nga proyekto anaa sa probinsiya.

Apan ang tigpamaba sa DPWH-7, Marie Nillama, nibutyag sa Banat News nga dili tinuod nga wala’y proyekto ang ila’ng buhatan. Matud ni Nillama nga nagpadayun ang ila’ng mga proyekto apan mas daghan lang sa dakbayan sa Mandaue tungod sa paghimo’ng national roads sa kadalanan.

Si Nillama nibutyag nga tan-awon na lang sa katawhan ang kausaban sa kadalanan. – /GMR (BANAT NEWS)