Unom ka attack choppers makumpleto karong tuiga

CEBU, Philippines – Gipahibalo sa Philippine Air Force (PAF) nga makumpleto karong tuiga ang tanang gipalit nga “power” attack helicopters.

Matud pa sa report sa Interaksyon nga gikutlo gikan PTV-4 gikan ni PAF commander Lt. Gen. Jeffrey Delgado , duna pay unom nga umaabot nga attack helicopters ang PAF.

Una nang gi-commission niadtong Agosto 17 ang duha ka Augusta Westland AW-109E “Power” attack helicopters. Masaligon usab ang opisyal nga mission-capable ang nahibiling unom nga gipalit. Ang maong mga attack helicopters napalit sa gobiyerno sa kantidad nga P3.44 bilyones isip kabahin sa modernisasyon sa AFP.

Ang maong helicopter usa sa mga labing halinon kaayo nga light-twin engine helicopter alang sa maritime missions karon sa kalibotan ug daghang mga nasud ang nigamit niini sa ilang mga pwersa. Usa sa bentaha sa maong helicopter itandi sa uban mao ang gipaspason niini, kapasidad ug dili pangitaon ang mga piyesa alang sa maintenance.

Itandi sa ubang mga helicopters sa AFP, ang AW-109E attack helicopter sa PAF adunay forward-looking infrared (FLIR) nga maghatag sa piloto og bentahe ilabi na panahon sa kagabhion. (Gikan sa Wires/EIM)