Surrender ang panawagan sa mama ni Alegre

CEBU, Philippines – Nanawagan ang inahan sa abogada nga gipatay, Marietta Ocañada, sa nipatay sa iya’ng anak nga si Atty. Amelie Ocañada Alegre nga  motahan na lang sa mga awtoridad.

Matud niya nga ang mga madre nag-ampo alang sa pagtahan sa mga mamumuno ug utok sa pagpatay.

Gabii niadto’ng Agosto 13 gibanhigan patay si Alegre samtang nagmaneho sa iya’ng sakyanan nga nakaingon usab sa pagkaangol sa iya’ng sakay nga sila si Atty. Briccio Joseph Boholst ug ni Antonio Pino sa dalan Catalino U. Ouano, Looc, dakbayan sa Mandaue.

Gihingusgan sa Mandaue City Police Office ang pagpangita sa duha ka suspek sa mao’ng krimen.

Si Superintendent Michael Antony Bastes, hepe sa Investigation Detection and Management Bureau sa MCPO, niingon nga ang duha nga   nigawas sa cartographic sketches mao karon ang nasentro nga madakpan.

Si Mayor Jonas Cortes nipadayag sa pagpakighiusa sa kapolisan alang sa pagdakop sa mga mamumuno sa gipatay nga manlalaban.

Si Senior Superintendent Mariano Natuel Jr. nga mao’y officer-in-charge sa MCPO, niingon nga upat ka anggulo ang ila’ng gihimuan og pakisusi. – /GMR) (BANAT NEWS)