P500 mil shabu nasakmit

CEBU, Philippines – Mokabat sa kapin P.5 milyon nga kantidad sa shabu  ang nasakmit sa duha ka operasyon sa kapolisan sa managlahing dapit dinhi sa Sugbo.

Duha ka tawo ang nadakpan sa checkpoint sa Sitio Basbas, Barangay Pagsabungan, dakbayan sa Mandaue sa miaging gabii nga giilang sila si Coline Alferes  Adulfo, 37, ug Anthony Batican, 18, pulos taga Sitio  Canumay sa Brgy. Pagsabungan sa maong dakbayan.

Sumala pa ni Police Officer 2 Peter Martinez sa Presinto 3 sa Mandaue City Police Office (MCPO) ang ilang hepe nga si Senior Inspector Genilo Veraque  nagpahigayon og checkpoint sa dapit dihang nahiagi ang motorsiklo nga gimaneho ni Adulfo ug angkas usab niini si Batican.

Pakyas ang duha pagpakita og lisensya ug rehistro sa motor mao nga gidakop ug girekisa ang kalawasan, ug diha nasakpan ang duha ka dagkong nga paketeng gidudahang shabu kang Adulfo ug laing duha ka medium packs usab kang Batican.

Samtang wala na nakadagan gikan sa mga kamot sa kapulisan sa dakbayan sa Talisay ang usa ka gidudahang drug runner sa  Brgy. Jaclupan nga si Paolo Labado, taga Bulacao sa siyudad sa Sugbo.

Gitug-an ni Senior Police Officer 1 Edgar Causon, sakop sa Talisay City Police nga nakaapil sa pagronda nga nahinabi sa Banat News nakadawat sila og report nga dunay mga tawong nanuyop sa maong dapit.

Kilid sa Mananga Watershed nasigpatan ang usa ka payag nga adunay mga lalaking nagtapok sa sulod apan nakabantay dayon ug naglumbaanay og panagan.

Si Labado nga nakalitan pag-abot sa mga polis wala na nakalihok ug mao’y nasikop ug nakuhaan og duha ka medium size nga gituohang shabu nga mikantidad og P118, 472.

Sumala pa ni Causon ang drugas nga nakuha kang Labado gikan sa Brgy. Duljo-Fatima sa siyudad sa Sugbo  ug sa Brgy. Tangke sa Talisay. – /EIM) (BANAT NEWS)