Sharpe dalhon sa Zamboanga
CEBU, Philippines - Nagtinguha ang pamilya ni Virginia Sharpe nga dalhon sa Zamboanga del Sur ang iya’ng patay’ng lawas ug sa 11-anyos nga anak nga si Mica Ella kinsa gipatay sulod sa ila’ng panimalay sa Deca Homes, Tungkil, Minglanilla.
Apan matud sa igsuon ni Virginia nga si Rebecca Datoy nga magpaabot sila sa desisyon sa Briton nga bana sa iyang manghud.
Si Virginia kinamanghuran sa pito ka managsuon ug matud ni Datoy nga niabot kini sa Sugbo diha’ng nag-edad og 15-anyos kay nilayas gikan sa ila’ng lugar sa Aurora, Zamboanga Del Sur aron mangita og kaayuhan gumikan sa kalisud sa ila’ng kahimtang.
Matud ni Datoy nga taas nga panahon nga wala nakontak si Virginia ug kini nakauli diha’ng nangita sa iya’ng birth certificate kay mo-graduate na siya sa high school.
Dugang ni Datoy nga kanunay motabang si Virginia kanila diha’ng niarang-arang na ang iya’ng kinabuhi.
Gani sa niagi’ng semana nagpadala og P6,000 si Virginia sa iya’ng inahan aron ipalimpyo sa basakan ug sa uban pa nga gastohanan.
Sama sa mga silingan sa namatay, gisayangan si Datoy sa iya’ng manghud ug sa anak tungod kay daghan pa kini og mga pangandoy ug matinabangon sa uban.
Nagtingkagol na sa selda sa Minglanilla Police Station ang mga suspek nga sila si Manuel Gomera Labrador, Estelito Sasidor Recamora ug George Mamac Baquiran. (BANAT NEWS)
- Latest
