Mga tulisan nagpista

CEBU, Philippines - Bisan sa gipasiatab nga hugot nga seguridad sa kapolisan tungod sa Asia-Pacific Economic Conference alang sa seguridad sa mga delegadong manambong, nakalusot gihapon ang mga tulisan diha sa mga hilit nga dapit sa Metro Cebu.

Usa ka 21-anyos nga lalaki ang nakuyapan sa dihang nasumbagan sa duha ka lalaki sa miaging Biyernes sa gabii sa Sitio Sea Breeze, Brgy. Mactan sa dakbayan sa Lapu-Lapu.

Nagkanayon si Police Officer 1 Marlou Britania sa Mactan Police Station 2 nga ang biktima mao si Gabriel Ceñal, taga Sitio Bagumbayan 1, Brgy. Maribago.

Gibana-bana nga anaa sa P9 mil ang nakuha nga kwarta sa mga tulisan nga nagpakaaron ingnong mopusta og lotto apan gibalibaran ni Ceñal tungod kay off line na ug padulong na siya manirado.

Sa pagtalikod sa biktima kalit mideklarar og hold-up ang mga suspetsado ug human nakuha ang halin gisumbag sa usa ang nawong ni Ceñal kinsa nakuyapan.

Nakamata lang ang biktima dihang nagkagubot na ang mga tawo sa iyang palibot. Blangko pa ang kapolisan kun si kinsa ang mga tulisan.

 Mandaue City

CEBU, Philippines - Samtang nawad-an sa iyang koleksyon ang delivery van collector  human gitulis sa duha ka wala mailhing armadong  mga lalaki sa Centro, Brgy. Labogon sa  dakbayan sa Mandaue.

Si Police Officer 3 Carlos Zapanta sa Presinto  3 sa  Mandaue City Police  (MCPO) miila sa biktima mao si Joven Barte, 41, nagpuyo sa Sitio Pagulan sa Brgy. Pagsabungan sa maong dakbayan.

Padulong na unta ang biktima sa iyang gitrabahoan nga Rules Marketing dihang gibabagan ug gitulis sa duha ka armadong lalaki ug giilog iyang bag nga gisudlan sa P19,031.50 nga koleksyon. Ang mga tulisan dali nga mipabulhot palayo sa maong dapit.

 Cebu City

Sa laing bahin, duha ka mga tawo ang nidangop sa Fuente Police Station human sila nabiktima sa pagpanulis sa duha ka mga wala mailhing tawo sa may Ranudo Extension sa Brgy. Santa Cruz ning dakbayan sa Sugbo, kagahapon sa kaadlawon.

Ang mga biktima mao sila si  Marjun Capa Roble, 26, ug Anton Seno Jacalan, 29. Samtang ang mga tulisan pulos nagsuot og short pants, diin ang usa niini nagsul-ob og jacket, samtang ang usa nagsul-ob og puwa nga t-shirt.

Matud pa break time sa ilang trabaho maong nigawas ang duha apan  gitulis na hinuon sila.

Sa kahadlok sa mga biktima wa na sila manukol ug gikuha ilang I-phone balor P25mil, P450 cash ug pagkahuman daling nangikyas ang mga tulisan.

Miangkon si Chief inspector David Señor , hepe sa Fuente Police Station sa Banat News nga wala silay beat patrol nga gibutang sa maong lugar ug nagkuwang karon iyang mga sakop tungod sa deployment sa APEC.

Tulisan nadakpan

Sa laing bahin, nadakpan sa kapolisan sa lungsod sa Alcantara ug Moalboal ang usa ka Jerrymie Pulgo Gacquing, 30, taga Lanao, Moalboal diha sa Brgy.  Palanas sa lungsod sa Alcantara.

Nakuhaan og armas ug usa ka paketeng shabu ang suspek kinsa  gidudahan nga maoy nanulis niadtong Huwebes sa Brgy. Poblacion sa lungsod sa Alcantara diin di momenos sa P50 mil ang nasakiyo sa tulisan.

Si PO2 Daryll Linda, desk officer sa Alcantara Police Station nga nahinabi sa Banat News miingon nga positibong gitumbok ni Arnel Tagalong, ahente sa Dranix Distributors ang suspek nga maoy nitulis kaniya. (BANAT NEWS)