Karaang balay sa doktora nasunog

CEBU, Philippines - Naugdaw ang tulo ka balay nga naglakip sa usa ka ancestral house nga gipanag-iya sa usa ka doktora sa Poblacion, Tabuelan pasado alas 4 sa nakalabay nga hapon.

Duha sa tulo ka balay ang gipanag-iya ni Dra. Elena Pamplona kinsa wala atol sa sunog kay may gilakaw sa dakbayan sa Sugbo.

Lakip sa naugdaw ang usa ka balay nga tupad sa balay sa doktora.

Matud ni Fire Officer 1 Boubeth Yonting sa Tabuelan Fire Station nga nahinabi sa Banat News nga alas 4:47 sa hapon nila nadawat ang alarma sa sunog ug sulod sa usa ka oras hingpit nga napawong ang sunog.

Si Yonting niingon nga gumikan kay locked ang gate sa balay ni Pamplona naglisud sila sa pagsulod ug dali sab kaayo nga nidaku ang kayo kay sagad nga dapat sa balay mga kahoy ug karaan na.

Sumala pa ni Yonting nga maayo na lang kay may kongretong koral ang balay nga mao’y nakapugong sa kayo nga makatabok sa ubang kabalayan.

Gibanabana nga nagbilin og tunga sa milyon ka pesos nga danyos ang sunog.

Sa inisyal nga pagsubay sa kabomberohan, linya sa kuryente ang nakita nila nga posible’ng hinungdan sa sunog. (Jojo C. Ugdol/GMR)(BANAT NEWS)