Nagbinirahay sa shoulder bag, P21 mil nakuha

CEBU, Philippines - Nasakiyo gyud sa armado og kutsilyo nga manglabnihay ang mokabat sa P21,000 nga kantidad gikan sa usa ka negosyante nga babaye nga gilabnihan sa shoulder bag sa sitio Mabolo, Basak, dakbayan sa Mandaue alas 2 pasado sa niagi’ng hapon.

Si Senior Inspector Genilo Veraque, hepe sa Presinto 3 sa Mandaue City Police Office (MCPO), niila sa biktima nga si Charlene Sucion, 49, taga sitio Canumay, Labogon sa mao’ng dakbayan.

Matud ni Veraque nga naglakaw lang ang biktima paingon unta sa pag-atang og sakyanan apan kalit lang gisugat sa wala hiilhi’ng lalaki nga nagsuot og T-shirt nga itom ug nagkawo, yagpison ang panglawas ug gilabni ang shoulder bag niini.

Naggunitan pa sa biktima ang iya’ng shoulder bag apan gibunlot sa lalaki nga nakaingon sa pagkaligid sa biktima sa taliwala sa karsada apan wala buhii ang shoulder bag bisan nagkapangos-pangos.

Ang lalaki nga napungot niibot sa giluklok nga kutsilyo ug gihan-an sa pagduslak ang biktima hinungdan nga napugos na lang sa pagbuhi niini.

Dali unta’ng gihimo ang hot pursuit operation batok sa manglabnihay apan wala na igkita sa mao’ng lugar. (Romeo T. Limpangog/GMR)(BANAT NEWS)