Habal-habal nabulahan

CEBU, Philippines - Nakapahimulos ang mga drayber og habal-habal sa gipatumang re-routing sa Cebu City Transportation Office sa pipila ka dapit sa siyudad sa Sugbo. Kini human nga ang dalan Pope John Paul II di pasudlan og pasaheroan tungod kay usa kini sa ceremonial route sa mga delegado sa Asia Pacific Economic Cooperation (APEC) Summit nga pormal nga magsugod karong adlawa Agosto 22.

Tungod kay walay mga jeep de pasaheroan nga makaagi sa maong lugar ang mga sumasakay mapugos pagsakay og habal-habal aron lang makaabot sa ilang destinasyon.

Ang mga habal-habal drivers sama nila ni Allan Binoong ug Mixeal Lumapay dako og kita kagahapong adlawa itandi sa mga normal nila nga pagpamasahero.

Kaniadto P300 ngadto sa P400 ang ilang kita sa pagpamasahero apan kagahapon sulod lang sa 30- minutos nakaabot na sila og P1,000.

Matud nila, ang plete magdepende kun pila ray ilang masabutan sa ilang pasahero ug ang labing menus mao ang P30 ug ang pinakadako P100 depende sa gilay-on sa destinasyon.

Ang naapektahan sa rerouting mao ang biyahe sa 03Q, 06H, 04L, 04M, 09J, 10H, 08F, 01G, 12E, 12G ug 12J. Tungod usab niini daghang nagbagulbol tungod kay nahasol ang mga sumasakay ilabi na niadtong wa magbasa og pamantalaan ug maminaw og balita  nga dunay re-routing. Apan ang operations head sa CCTO Joy Tumulak miingon nga mipagawas g’yud silang daan og mga advisories kalabot sa re-routing tungod sa APEC meet. (Decemay P. Padilla/EIM)(BANAT NEWS)