Mary Ann BOPK na karon

CEBU, Philippines - Human moluwat isip minority floor leader sa Konseho sa dakbayan sa Sugbo, natubag na g’yud ang mga pangutana human pormal nga gipahibalo ni Cebu City Councilor Mary Ann de los Santos nga mitapon na siya sa partido ni kanhi mayor Tomas Osmeña nga Bando Osmeña-Pundok Kauswagan.

Si de los Santos pormal nga mianunsiyo nga iyang gidawat ang imbitasyon sa kanhing kaaway sa politika nga si Osmeña kagahapon atubangan sa gatosan ka mga opisyales ug residente sa Barangay Lahug.

“Today, I declare my acceptance to the invitation of the BOPK to be part of their family. I vow to work hard with my new family,” matud ni de los Santos.

Gibutyag niya nga dugay siyang naghunahuna sa pagbalhin sa BOPK, apan mapasalamaton siya sa mainiton nga pagdawat ug pagsugat kaniya.

Sa wala pa siya mibalhin sa BOPK, siya ra ang nakadaog sa North District ubos sa Team Rama sa 2013 nga elections.

“Taas nga proseso nga akong gibuhat, murag nagkampanya sa akong kaugalingong barangay. Wala koy laing ikapasalig kaninyo, kun dili I will not do anything to put barangay Lahug in danger. Akong gipangayo ninyong tanan, inyong pagsalig kanako,” matud ni de los Santos.

Tungod sa deklarasyon ni de los Santos, ang ubang Lahug barangay officials mi-deklara pud nga motapon na usab sila sa BOPK kay misalig silang de los Santos.

Ang relasyon ni de los Santos ug ni Mayor Michael Rama nausab sugod sa miaging tuig nga gideklara ni Rama nga “failure of bidding” ang bidding process sa pag-reconstruct sa Cebu City Medical Center.

Gi-usban pa g’yud kini sa miaging buwan nga miapil og botar si de los Santos kauban sa BOPK nga mga konsehal sa pagpasar og resolusyon nga nag-request sa executive department sa City Hall sa pag-defer sa paghimo og lakang kabahin sa pagbaligya sa luna sa South Road Properties. Si Osmeña mihulagway ni de los Santos nga dili mabaligya.

“Mayor Rama has P8 billion in cash and every other barangay official wants to join his administration. And I can see who the real Mary Ann is. She asked for no conditions. And the message is very simple. Mary Ann de los Santos is not for sale. Barangay Lahug is not for sale,” matud ni Osmeña.

Ang mga BOPK nga opisyales mitambong  kagahapon mao sila si  Congressmen Raul del Mar ug Rodrigo Abellanosa.

Diha usab sila si Councilors Margarita Osmeña, Nestor Archival, Alvin Dizon, Alvin Arcilla.

Sa laing bahin, alang ni Rama nga sirad-an na ’sab sa Team Rama ang pag-apil ni de los Santos ubos sa maong partido.

Dugang ni Rama nga dili niya kini tan-awon isip dakong kawad-on sa ilang partido tungod wala naporma ilang partido tungod lang sa usa ka tawo. (Jean Marvette Demecillo/EIM)(BANAT NEWS)