Kawani sa PAO nadakpan sa drug raid

CEBU, Philippines - Usa ka gikatahong empleyado sa Lapu-Lapu City Hall nasikop sa kapolisan human nalambigit sa ginadiling drugas kuyog ang laing duha ka lalaki sa Sangi Road, Brgy. Pajo dakbayan sa Lapu-Lapu kagahapon.

Matud ni Police Senior Inspector Verniño Noserale, hepe sa City Intelligence Branch sa Lapu-Lapu City Police Office nga si Junichi Igot, 23 anyos, residente sa Sitio Agus Dako, Barangay Agus ang gidakop atol sa gipahigayun nga buy-bust operation sa miaging  ala 1:20 sa kaadlawon sa maong dapit.

Sa inisyal nga pakisusi sa kapolisan, anaa na-assign si Igot sa Public Attorney's Office. Lain nasikop mao ang target  sa buy-bust operation nga si Salvador Monterola ug si Ronnie Espinosa, parehong nag edad og 25 anyos ug parehong residente sa maong dapit.

Dugang ni Noserale, nadakpan tungod gihapon sa drugas si Monterola sa usa ka unit sa Police Regional Office-7 sa miaging tuig apan wa matino kun nganong nakagawas kini.

Usa ka search warrant gikan ni Judge Toribio Quiwag sa Regional Trial Court -Branch 27 sa Lapu-Lapu City ang gigamit sa kapolisan sa pagronda kagahapon sa kaadlawon.

Nakuha kang Monterola ang usa ka sling bag, 10 ka medium pack sa gituhoang shabu, P2 mil nga halin sa illegal nga drugas ug .357 magnum nga adunay unom ka bala, budol money nga P6 mil, drug paraphernalia. Usa ka plastic container, lima ka gagmay’ng pakete sa shabu ug Honda XRM Motorcycle (JC 6599) ang nakumpiska gikan ni Espinosa, nga gikatahong "runner" sa suspek.

Samtang nakuha gikan ni Igot ang laing lima ka gagmay’ng putos sa shabu. Ang mga nasakmit nga drugas gibana-bana nga moabot sa P700 mil.

Samtang nadakpan sa kapolisan sa checkpoint diha sa Pulpogan, Lungsod sa Consolacion sila si Jose Melgreg Valgas Requiso, 22, taga Barangay Luyang,  San Remigio, Ruel Salmbot Yurag, 33, taga Luyang, San Remigio ug Cathy Solidad Adlawan, 38 nga taga Ibabao, Tugbongan, Lungsod sa Consolacion.

Ang tulo  nagsakay og motorsiklo nga walay plate number ug dihang gipara sa checkpoint misuway sila og panagan apan naapsan.

Nakuha gikan sa tulo ang duha ka medium size nga paketeng shabu ug tulo usab ka gagmay nga pakete. (Christell Fatima Tudtud ug Romeo T. Limpangog/EIM)(BANAT NEWS)