Sugbo preparado na sa IEC 2016
CEBU, Philippines - Preparado na ang kadagkuan sa Archdiocese of Cebu lakip na niini ang preparasyon kun ugaling mahinayon g’yud pag-anhi si Pope Francis atol sa ipahigayon nga International Eucharistic Congress 2016 nga ipahigayon dinhi sa dakbayan sa Sugbo.
Matud pa ni Archbishop Jose Palma, walay angay kabalak-an ilabi na may kalabutan sa physical preparations tungod kay subsob karon ang ilang mga pagpangandam.
Sumala pa ni Palma, sayod siyang daghan ang motambong sa IEC ilabi na kadtong mga kaparian ug layko nga gikan sa nagkadaiyang dapit sa Pilipinas. Malaumon si Palma nga malinawon, mabulokon ug di makalimtan ang pagpahigayon sa IEC dinhi sa Sugbo.
Dako gihapon ang pagsalig sa Arsobispo nga motambong ang Santo Papa tungod kay kanunay man kini dunay surpresang buhaton.
Giangkon hinuon niya nga subay sa kasaysayan sa IEC, maihap lang nga dunay Santo Papa nga motambong, apan kun kini buhaton sa kasamtangang lider sa Simbahang Romano Katoliko, gipaneguro nilang daan nga preparado sila.
Giawhag hinuon ni Palma ang katawhan nga mag-ampo aron magmalampuson ang 51st IEC dinhi sa Sugbo. (BANAT NEWS)
- Latest
