Granada miulbo,1 patay

CEBU, Philippines - Usa ang patay ug duha ang angol human ang  nag-inom nga pamilya   gilabayan  og granada diha sa Sitio Calachuchi, Brgy. Cagay , lungsod sa Barili sa nakalabay nga gabii.

Ang namatay naila mao si Renulfo Borres, 22, samtang ang mga naangol mao ang iyang amahan nga si Vicente Borres, 51, ug ang ilang usa ka silingan nga si Antonio Vergara nga parehos nga nagpuyo sa maong dapit.

Matud pa ni Senior Inspector Julius Ompad, hepe sa Barili Police nga nahinabi sa Banat News didto usab  sa duol ang usa ka anak ni Vicente nga si Odeline Borres, 35, nga bag-o lang naabot gikan sa probinsya sa Bukidnon kauban ang iyang kapuyo nga si Arnel Paloma, 38. Apan swerte wa maigo ang duha.

Sumala pa ni Ompad nga managlahi ang mga pamahayag sa mga kabanay nga diha sa hitabo ilabi na sa managkapuyo nga Arnel ug Odeline ngadto sa pamahayag sa inahan niini. Ang managkapuyo miingon nga human sa pagbuto, nanagan silang duha sa kamaisan ug nitago sa usa ka balay sa ilang paryente sa kahadlok nga posibleng duna pay mosunod nga pagbuto.

Matud pang Ompad, nga si Odeline nangangkon nga sa wala pa ang pag-ulbo nakabantay siyang dunay butang nga ni-spark sa dughan ni Renulfo nga natagak sa ubos ug paglabay sa pipila ka segundos niulbo ang ilang gikahimutangan.

Ang amahan sa namatay nakaangkon og samad gikan sa shrapnel sa granada kay tayming sab kini nga gikan miduol sa iyang anak.

Nagduda si Ompad nga posibleng gikan kang Renulfo ang granada nga mibuto ug dala sa kahubog ug tungatunga sa ilang panag-estorya aksidente niini nga naibot ang pin sa granada.

“Kung basihan ang ilang affidavit masubay nimo nga posibleng wala gilabay sa laing tawo ang granada. Ang nagpabuto naa sa ilang duol kay naa pa ma’y spark nga nakita, swerte lang kay wala sila (managkapuyo) naangol,” matud pa ni Ompad.

Alang ni Ompad imposible kaayo nga gikan nila Odeline ug Arnel ang granada kay lisod kaayo kining ipalusot gikan sa Mindanao gumikan sa kadaghan sa mga checkpoint karo’ng panahona ilabi na pagsulod sa Sugbo gumikan sa APEC Summit.

Hinuon wala ‘sab gipadaplin ni Ompad ang kalambigitan sa ubang tawo kay nakakuha sila og impormasyon nga manghagis si Vicente kung mahubog.

Atol sa hitabo sulay pa unta nga gidala sa Barili District Hospital ang anak ug amahan, apan nakabsan gayod sa kinabuhi si Renulfo samtang gibalhin sab sa Vicente Sotto Memorial Medical Center (VSMMC) si Vicente. Ang usa ka silingan sa mga biktima igo lang mipakita sa kapulisan kagahapon sa buntag nga nagpakita sa iyang samad sa tiil nga gituohang naigo sa shrapnel sa granada.

Nagpadayon pa ang gihimo nga imbestigasyon sa kapulisan aron pagsubay sa tinuoray nga hinungdan sa maong hitabo. (BANAT NEWS)