Opon hospital palapdan
CEBU, Philippines – Magtukod og bag-ong building ang kagamhanan sa dakbayan sa Lapu-Lapu alang sa tambalanan sa hinapos niini’ng tuiga tupad sa district hospital sa sitio Carajay, Gun-ob diin adunay P20.6 milyones nga pundo gikan sa Department of Health.
Tuyo niini nga mahimo na nga level two ang tambalanan nga mas ubos og gamay kaysa Mactan Doctor’s Hospital, sumala pa ni Mayor Paz Radaza.
Atol sa iya’ng State of the City Address, si Radaza nitataw nga iya’ng gipaminaw ang reklamo sa katawhan sa pag-atiman sa maayo’ng panglawas.
Sa bag-ong building ibutang ang emergency rooms, minor operating room, doctor's quarter, laboratory, x-ray ug blood bank sa ubos nga bahin samtang sa ikaduha’ng andana ang unom ka private rooms ug unom ka katre sa matag medical ward sa babaye ug lalaki.
Laing unom ka katre alang sa pediatric ward.
Ang tambalanan sa isla sa Olango usa na ka level one ug bugtong tambalanan sa Central Visayas nga adunay Comprehensive Emergency Maternal Obstetric and Newborn Care facility.
Ang district hospital gipasidunggan na sa “TB Cure Rate” ug "Maternal Care Package Accreditation" base sa 2013-2014 LGU scorecard sa tibuok nasud.
"This is what I meant by inclusive growth, no Oponganon is left behind," matud ni Radaza. – /GMR) (BANAT NEWS)
- Latest
