Negosyo Center gilusad sa DTI-7
CEBU, Philippines – Gilusad sa Department of Trade and Industry-7 ang labi’ng una nga Negosyo Center sa Sugbo nga nahimutang sa Osmeña Boulevard eskina dalan Lapu-Lapu sa siyudad diin nahimutang ang regional ug provincial offices.
Kini ang ika-79 ug 80 nga Negosyo Center sa nasud ug karong adlawa gitakda nga buksan sa siyudad sa Bogo ang ika-81 nga Negosyo Center.
Tumong niini ang paggiya sa mga indibidwal ug ubang pundok nga gusto’ng mag-negosyo sa angay nila nga buhaton aron magmalampuson.
Ang assistant regional director sa DTI ug program manager sa Negosyo Center, Dorecita Delima, niingon nga usa ka one-stop shop ang mao’ng center diin manghatag sila og business advisory, registration assistance ug information ug advocacy sa mga negosyante.
Sigun pa ni DTI Undersecretary sa Regional Operations Group, Zenaida Maglaya, nga dili mahimo ang pagtabang sa publiko kun dili tungod sa tabang sa pribado’ng sektor.
Nagtinguha ng DTI nga makaumol og dili mominus 100 ka Negosyo Center karong tuiga. Nagkanayon si DTI-7 Director Asteria Caberte nga ang ubang lugar sama sa Dumaguete, Bohol, Siquijor ang aduna na’y Negosyo Center.
Katambayayong sa DTI ang Social Security System, SMED Council sa siyudad sa Sugbo, DILG, DOST, PhilHealth, PagIbig ug mga pribado’ng ahensiya. – /GMR) (BANAT NEWS)
- Latest
