Arraignment ni Super Bob gisibog

CEBU, Philippines – Ang kampo ni kanhi kongresista Tomas Osmeña dili gayud makig-amicable settlement tali kang veteran broadcaster Bobby Nalzaro mahitungod sa kaso nga libel nga iyang giatubang sa hukmanan.

Si manlalaban Kirk Bryan Jaca-Repollo, abogado ni Osmeña, mitataw nga walay kahigayonan nga ang iyang kliyente makig-areglo kang Nalzaro sa mao nga kaso.

Gusto ni Osmeña nga palutawon ang matuod nga bakak ang pamahayag ni Nalzaro sa iyang lindog sa mantalaan nga naghimo-himo ra siya og ebidensiya sa gipasaka niyang kaso ni City Treasurer Diwa Cuevas.

Matud ni Osmeña nga dili siya magpabayad og danyos apan gusto lang niya nga pamatud-an nga sayop si Nalzaro sa iyang pag-ingon nga “fabricated” ra ang iyang ebidensya batok ni Cuevas.

Kagahapong adlawa unta ang arraignment sa kaso ni Nalzaro diin pangutan-on siya sa huwes kun sad-an ba siya o dili sa kaso nga libel, apan giuswag ang arraignment kay aduna pay mga awhag ang abogado sa magsisibya nga wala pa maresolbar sa korte.

Si Osmeña miingon nga nasuta niya nga dili usab tinuod nga 50 ang abogado ni Nalzaro nga iatbang sa nagbinugtong niya nga abogado.

Matud ni Osmeña nga bisan unsa kadaghan sa abogado ni Nalzaro maglisud kini sa paglaban kaniya kay klaro kaayo nga gibutang niya sa iyang lindog nga fabricated ang iyang mga ebidensya bisan og gibase kini sa Annual Audit Report sa Commission on Audit. (BANAT NEWS)