Di LP gihatagan og patrol cars

CEBU, Philippines – Kagahapon 44 ka mayor sa Sugbo ang gipaadto sa Manila lakip na si Gobernador Hilario Davide III aron motambong sa kalihukan.

Si Asturias Mayor Allan Adlawan sa One Cebu Party nagkanayun nga karon pa sila nakasuway nga gihatagan og brand new nga sakyanan.

Matud niya nga ang ila’ng lugar nagkinahanglan og power drive nga sakyanan.

Gibutyag ni Adlawan nga sa mensahe ni DILG Secretary Mar Roxas usa sa gihangyo niini mao ang pagmintinar sa kahusay ug kalinaw sa mga lugar.

Si Balamban Mayor Ace Binghay nga kaalyado usab sa One Cebu Party nagkanayun nga ang nitambong sa turnover ceremony ang iya’ng inahan nga si Bise Mayor Rosario Binghay.

Ang pagpanghatag giingong tungod sa nagkaduol nga eleksiyon.

Apan matud ni Binghay nga maatol nga duol na ang eleksiyon o dili ang labi’ng importante duna sila’y nadawat.

Si Malabuyoc Mayor Lito Narciso Creus kinsa kaalyado usab sa One Cebu Party wala usab nitambong sa turnover ceremony apan ang ila’ng hepe sa kapolisan maoy nitambong.

Ang mayor nagkanayun nga daku kaayo og tabang kanila ang bag-ong sakyanan nga ila’ng nadawat.

Dugang ni Creus nga dunay mga natahap nga dunay kalabutan sa politika ang pagpanghatag og sakyanan.

Apan nagpasalamat siya nga wala’y nahitabo’ng diskriminasyon tungod kay bisan unsa ang partido sa politika gihatagan gihapon. – /GMR) (BANAT NEWS)