Libud-suroy di hipuson sa Mandaue

CEBU, Philippines – Wala’y pagpanghipos sa libud-suroy nga kabataan sa dakbayan sa Mandaue atol sa Asia-Pacific Economic Cooperation (APEC) Meetings sa Sugbo sugod karong Agosto 22.

Matud ni Mayor Jonas Cortes nga may pundo ang kagamhanan sa dakbayan alang sa pag-atiman sa kabataan nga gipasagdan sa mga ginikanan ubos sa City Social Welfare and Development Office.

Si Superintendent Michael Anthony Bastes, hepe sa Investigation Detection and Management Bureau (IDMB), niingon nga ang pag-atiman sa libud-suroy nga mga bata paagi sa pagpakunhod sa krimen.

Samtang si Archbishop Jose Palma wala’y pagsupak sa paghipos sa mga libud-suroy o nangatulog sa kadalanan basta seguruhon nga mahatagan sa ila’ng batakan nga panginahanglan.

Matud ni Palma nga ang paghipos usa ka maayo’ng buhat apan usa usab kini ka okasyon nga sila makakaon sa sakto ug makakaligo sa lugar diin sila dad-on ug adunay katulgan nga klaro.

“Amo unta ini nga secure sa katulgan ang mga gi-rescue ug dunay humane treatment aron kini’ng mga tawo makaingon nga bisan naa ra sila sa kadalanan duna gihapon sila’y dignidad ug mahatagan usab sila sa ila’ng panginahanglanon," matud ni Palma.

Ang kagamhanan sa dakbayan sa Sugbo nipahigayun og pagpang-rescue sa mga tawo nga naa sa kadalanan mangatulog matag gabii ug gidala sa San Roque gym isip ila’ng temporary shelter ug buhian lang matag alas kwatro sa kadlawon.

Daghan sa mga na-rescue ang nangreklamo tungod kay mawala ang ila’ng panginabuhian sa kadalanan nga mao ang pagpamunit og mga plastic, lata ug bisan unsa nga ila’ng mapatimbang aron aduna sila’y ikapalit og pagkaon.

Apan si Rosalima Cimagala, pangulo sa Task Force For A Better Life, nibutyag nga ang ila’ng pagpang-rescue aron masayran kung asa gikan ang mga tawo ug unsa’y mahimo nga tabang sa siyudad ngadto kanila. – /GMR) (BANAT NEWS)