P600 mil alahas sa doktor gikawat
CEBU, Philippines – Mokabat sa P600 mil nga kantidad sa mga alahas ang nadala sa kawatan nga milungkab sa Medical Arts Building sa North General Hospital diha sa Brgy. San Jose sa dakbayan sa Sugbo nga nadiskobrehan pasado alas 7 niadtong nakalabay nga buntag.
Ang guwardiya sa maong tambalanan nga si Loreben Tuanda mao na’y mitawag sa kapulisan human nabantayan niini nga nalangkat ang kisame sa maong lawak bisan nakasirado ang pultahan.
Sa imbestigasyon sa kapulisan sa Talamban Police nga gipangulohan ni SPO2 Roy Jayme nasayran nga ang kawatan anha niagi sa Room 8 pinaagi sa paglusot sa sliding window padung sa room 9 nga lawak sa usa ka Dr. Irene Esplanada.
Sulod sa maong lawak gilimas sa kawatan ang nagkadaiyang mga mahalong alahas nga mikantidad og P600 mil.
Apan ang officer- in-charge sa Talamban Police nga si Senior Inspector Alvin Llamedo nga nahinabi sa Banat News nagduda nga dunay inside job sa maong hitabo.
Kini human nabantayan nga ang room 9 halos atbang ra sa information desk apan wala g’yuy nakabantay nga adunay nisulod nga kawatan. Usa sab sa namatikdan sa opisyal nga walay mga butang nga nawala sa room 8 ug room 7. Nasuta ‘sab sa opisyal nga wala’y close circuit television ang maong dapit ug sa blotter report sa Talamban police walay gibutang nga address sa biktima nga doktor. – /EIM) (BANAT NEWS)
- Latest
