Seaman nalatayan sa trak patay

CEBU, Philippines - Patay ang usa ka seaman nga nagmaneho og motor samtang angol ang iyang ig-agaw nga menor de edad human sila  nabanggaan sa usa ka cargo truck sa miaging hapon sa Brgy. Banhigan sa lungsod sa Dalaguete.

Ang namatay naila nga si Owen Anthony Carumba, 28, samtang ang naangol mao si German Renz Carumba, 16,  mga molupyo sa maong lugar.

Mitahan hinuon sa kapolisan ang nagdrayb sa cargo truck mao si Mark Louie Adelante, 29, nga taga Obong, Dalaguete human sa hitabo.

Sumala pa sa imbestigador sa Dalaguete Police Station nga si SPO3 Cleto Pia, nga ang  seaman duha pa lang ka semana nga ninaog sa barko ug buot ni nga mobisita sa iyang mga barkada ug kaliwat sa pikas barrio, sa Brgy. Coro.

Dala ang usa ka kahon nga beer angkas ang iyang ig-agaw nga si German Renz padulong sa Coro.

Apan sumala pa ni Pia nga di pa lang dugay nga nakapadagan   natapsingan sila ni Adelante hinungdan sa pagkalagpot sa motor.

Si German Renz didto nalagpot sa kilid sa dalan ug nakaangkon og kadaot sa iyang lawas apan ang iyang ig-agaw nga nagmaneho sa motor didto napunta sa dalan ug nalatayan sa luyo’ng ligid sa trak hinungdan sa iyang kamatayon.

Wa mohunong ang drayber human sa hitabo ug didto ni midiretso sa  estasyonan sa polis ug mitahan sa iyang kaugalingon.

Sumala pa ni Pia nga ang ginikanan sa namatay pursigido g’yud nga mopasaka og kaso ni Adelante bisan nga gihangyo ni sa tag-iya sa truck nga makigsabot-sabot lang sila ug ilang abagahon ang gastoan sa pagpalubong sa maong seaman ug sa gasto sa pagpatambal sa iyang ig-agaw.

Pasakaan og kasong reckless imprudence resulting to homicide and physical injury ang drayber  sa truck.  (BANAT NEWS)