Nadakpan sa checkpoint tulisan diay

CEBU, Philippines - Nasikop sa mga  sakop sa San Fernando Police Station ang usa ka  armadong lalaki diha sa police checkpoint sa Brgy. San Isidro nga gidudahang maoy responsable sa pipila ka tulis sa maong lungsod ug sa mga silingang dapit.

Ang nasikop naila nga si Marvic Cantil alyas Pahak, 30, taga Panadtaran, nga nakuhaan og kalibre .45 nga pistola ug duha ka medium size nga putos sa shabu.

Sumala pa ni Chief Inspector Sara Jane Recla, hepe sa San Fernando Police Station, nga nahinabi sa Banat News  nga dihang gipara sa iyang mga sakop si Pahak nabantayan nila nga nagbagal ang kilid niini.

Kay nagduda sila nga armas kini, ilang gihangyo ang suspek nga iisa ang iyang sinina ug nasakpan nga pistola diay kini hinungdan nga gidakop siya apan sa pagrekisa kaniya, nasakpan ang duha ka medium size nga pakete sa shabu sa iyang bulsa.

Diha sa police station dunay mga residente nga positibong nitumbok kaniya nga mao ang nitulis kanila.

Usa niini ang negosyante sa Carcar nga si Sphere Varga nga positibong mitudlo sa suspek nga mao ang usa sa duha ka armadong tulisan nga mitulis kaniya niadtong Miyerkules sa hapon ug misakiyo sa iyang P50 mil.

Ang suspek miangkon hinuon sa maong pasangil ug mitug-an usab kini sa iyang kaubang tulisan, apan dihang giimbitar ug gipresentar ang maong tawo sa mga biktima sa tulis, negatibo kini maong gibuhian  sa mga polis.   (BANAT NEWS)