Duha gipamusil, usa patay

CEBU, Philippines - Napalgan na lang nga patay ang usa ka lalaki nga may samad pinusilan sa iyang lawas sa miaging buntag sa Brgy. Santa Cruz, San Francisco sa isla sa Camotes.

Ang namatay giila sa kapolisan nga si Anthony Formentera, 21, molupyo ra pod sa nahisgotan nga lungsod.

Sa pagsusi sa grupo ni Senior Police Officer 3 Epifanio Sanjorjo, ilang nakita ang patay’ng lawas ni Formentera sa kasagbotan ug may upat ka samad pinusilan sa tiyan ug likod nga bahin sa iyang ulo.

Matud pa nga katapusang nakit-an sa iyang ginikanan ang biktima niadtong Huwebes sa gabii ug nananghid kini nila nga molakaw ug moadto sa iyang barkada. Nasuta sa imbestigasyon nga ang biktima nalambigit sa pipila ka insidente sa kawat sa ilang lugar ug nagduda ang kapolisan nga gipanimaslan kini sa iyang mga nabiktima.

Sa laing bahin, naangol ang usa ka magtutudlo sa Lamac National High School sa lungsod sa Barili human nga gipusil sa lalaking nagsakay og motor sa miaging gabii diha sa Brgy. Minolos.

Ang maestro naila nga si Amiel Villarmente, 42, nga taga Brgy. Azucena sa samang lungsod.

Nasuta sa imbestigasyon sa kapolisan nga ang biktima nagmaneho   gikan sa Dumanjug ug padulong siya sa lungsod sa Barili ug wa ni makabantay nga may nagsunod niya nga DT nga motor  ug gipusil siya sa sakay niini duha ka higayon sa kilid.

Swerte nga may nakatawag dayon  og polis  ug nakaresponde dayon si PO1 Camelo Bayang kinsa daling nidala kaniya sa Barili District Hospital.  (BANAT NEWS)