Libudsuroy gihipos sa siyudad

CEBU, Philippines - Mokabat sa kapin 60 ka mga libudsuroy ang gihipos sa mga tinugyanan sa siyudad sa Sugbo gikan sa mga aseras niadtong nakalabay nga gabii ug gipahiluna karon sa San Roque Gym, agi og pagpangandam sa umaabot nga Asia Pacific Economic Cooperation karong Agosto 22.

Biyernes sa gabii dihang gilibot sa City Anti-Mendicancy Task Force ang kadalanan dala ang mga trak ug gihipos ang mga libudsuroy.

Apan daghan sa mga gihipos ang nagbagulbol tungod kay wa pangandami sa siyudad ang maong operasyon tungod kay ang gidad-an kanila  sa San Roque Gym way kalainan sa aseras diin sila gipangkuha.

Walay kahigdaan, way tubig ug barado pa gihapon ang pansayan, ang nakalahi lang, dunay pagkaon para sa ilang tiyan.

“After the processing, we will collate the data and make a sort of research to find appropriate intervention that we can give to them. It’s not that they have lived on streets since they were born.

So that is why we are gathering them to know the cause on why they have dwelt on streets,” matud pang Rosalima Cimagala sa Anti-Mendicancy Office.

Dili lang mga tawo ang nahipos sa siyudad nianang gabhiuna, lakip sa gi-rescue mao ang mga binuhing iring ug iro sa mga libudsuroy nga kanunay nilang guyod-guyoron sa aseras. Ang Department of Veterinary Medicine and Fisheries (DVMF) nakahipos og dili mominos 20 ka mga iro ug iring nga iya sa mga libudsuroy.

Sa laing bahin, kapin 50 ka mga libodsuroy nga mga bata sa syudad  ang nitabang sa outreach program sa Waterfront Police Station ug sa Cebu Lumad Lions Club kagahapon.

Matud ni Senior Police Officer 1 Janice Tamayo, ang hepe sa Women’s and Children’s Protection Desk sa Waterfront Police Station nga pipila sa maong mga bata ang na-rescue na kaniadto ug ang uban kanila aduna pay ‘record’ sa pagpangawat ug pagpanglabni diha sa ilang buhatan.

Ang Chapter President sa Cebu Lumad Lions nga si Dr. Marilyn Campano mural paintings ang ilang adbokasiya aron mapanindot ang palibot. (BANAT NEWS)