5 patay, 2 kritikal sa pagpamusil

CEBU, Philippines - Duha ang patay samtang usa ang kritikal sa managlahi’ng pagpamusil sa dakbayan sa Sugbo apan dungan nga nahitabo alas 8 sa nakalabay nga gabii.

Sa Kalubihan, Tisa, patay ang 25-anyos nga si Donald Montesclaros nga taga sitio Mohon human gipusil samtang sakay sa motorsiklo nga gimaneho ni GB Foster Bertulfo, 26, taga Felina Village, kinsa kritikal ang kahimtang.

Matud ni Police Officer 3 Lou Pagara, imbestigador sa homicide section sa Cebu City Police Office, nga ang gunman nga may kauban nag-atang na’ng daan sa lugar.

Una’ng naigo si Montesclaros sa nagkadaiya’ng bahin  ug natumba ang motorsiklo apan nakahigayun pa og dagan si Bertulfo kinsa gigukod ug gipaulanan og bala.

Bisan naigo sa paa ug tiyan, nakahigayun pa og sulod sa koral sa usa ka balay si Bertulfo.

Agi sa likod sa balay niambak sa koral ang biktima hangtud nakit-an sa usa ka drayber sa traysikad nga mao’y naghatud sa Cebu City Medical Center. Nagduda si Pagara nga target sa krimen ang duha ka biktima.

Sa Upper Kalubihan, Banawa, barangay Guadalupe, gitusak-tusak sab sa bala ang 16-anyos nga lalaki samtang naglakaw. Giila ang namatay nga si Edgar Samson, taga Lower Kalubihan sa mao’ng dapit samtang ang suspek naila nga si Noel Saballa, hingkod, giingong usa ka notado’ng tulisan. Si Pagara niingon nga sa wala pa gipusil si Samson, gisugo pa kini sa suspek sa pagprenda sa usa ka butang.

Sigun ni Pagara nga lagmit adunay wala mauyoni ang suspek hinungdan nga gipatay ang batan-on.

Samtang nailhan sa kapolisan ang duha ka sakay og motorsiklo nga nipusil sa laing duha ka sakay sab og motorsiklo sa barangay Pajac, dakbayan sa Lapu-Lapu niadto’ng Huwebes.

Wala hinuon gibutyag ni Senior Superintendent Armando Radoc, officer-in-charge sa Lapu-Lapu City Police Office, ang detalye sa mga suspek.

Ala 1:45 sa hapon kalit gipusil sa ulo ang mga biktima’ng sila si Baregie Ybañez, 35, drayber sa habal-habal, ug ang 28-anyos nga pintor nga si Jason Rey Pusa, pulos residente sa gihisgutang barangay. Matud ni Radoc nga posible’ng may kalambigitan sa ilegal nga drugas ang pagpamusil human narekober sa crime scene ang duha ka kabhang sa .45 caliber pistol ug usa ka pakete sa ginadili’ng drugas sulod sa sling bag ni Pusa.

Sa laing bahin, nakalingkawas sa kamatayun ang giagtang sa pagpusil ang natulog nga lalaki sulod sa payag sa sitio Bataan, Estaca, lungsod sa Compostela alas 5 pasado sa buntag kagahapon.

Si Senior Police Officer 3 Larry Fernandez sa Compostela Police Station niila sa biktima nga si Reymar Tahago, 29, minyo nga nagpuyo sa mao’ng dapit.

Gisulod sa wala hiilhi’ng lalaki ang biktima nga nahinanok og katulog ug gipusil nga naghigda igo sa agtang. Dali’ng nisibat ang namusil samtang ang biktima nga nahigmata nga nagkadugo na ang agtang ang nakasinggit pa sa pagpangayo og panabang ug gidala sa tambalanan.

Sa dakbayan sa Toledo, patay ang 45-anyos nga lalaki human gi-agtang pagpusil sa barangay Sangi niadto’ng Huwebes sa gabii. Giila ang biktima nga si Amado Nacua Sasan, minyo nga taga sitio Campo 10, barangay Poog.

Ang biktima nagmaneho og motorsiklo paingon sa sentro sa dakbayan sa Toledo diha’ng gipusil sa wala mailhi’ng gunman. (Jojo C. Ugdol, Christell Fatima M. Tudtud, Romeo T. Limpangog ug Raymond D. Abarcas/GMR)(BANAT NEWS)